7 ноябри соли 2024 дар шаҳри Душанбе дар меҳмонхонаи “Хайят” Форуми миллии ташкилотҳои ҷомеаи шаҳрвандӣ ва фаъолони ҳаракати гендерии “Ҳамҷоя бар зидди зӯроварӣ” баргузор гардид. Чорабинӣ бо ташаббуси САҲА ва дар ҳамкорӣ бо шабакаи “Зиндагӣ бидуни зӯроварӣ” ташкил шуда, зиёда аз 80 иштирокчиро ҷамъ овард, ки дар он намояндагони Дастгоҳи иҷроияи Президенти Ҷумҳурии Тоҷикистон, як қатор ниҳодҳои давлатӣ, ташкилотҳои байналмилалӣ ва ҷамъиятӣ – фаъолони ҳаракати гендерӣ иштирок намуданд.
Ҳадафи асосии форум тақвияти нақши ҷомеаи шаҳрвандӣ дар татбиқи барномаҳои пешгирии зӯроварӣ нисбат ба занон ва духтарон буд. Иштирокчиён амалиёти ҳамоҳангшудаеро, ки ба тағйири афкори ҷамъиятӣ дар мавриди нобуд кардани зӯроварӣ ва густариши дастрасӣ ба дастгирӣ барои ҷабрдидагон равона шудаанд, баррасӣ намуданд. Ба мубодилаи таҷриба ва омӯзиши таҷрибаҳои пешрафтаи минтақа диққати махсус дода шуд.
Ширин Рашидова аз Ӯзбекистон, директори маркази рушди ташаббусҳо “Ниҳол”, дар бораи ташаббусҳои кишвараш оид ба пешгирии зӯроварӣ нисбат ба занон ва духтарон маърӯза кард. Дар ҷараёни муҳокима имконияти истифодаи таҷрибаҳои муваффақи Ӯзбекистон дар Тоҷикистон баррасӣ шуд.
«Ҷавонон — омиле муҳим дар ташаккули ҷомеаи фарогир ва пешбурди баробарии гендерӣ мебошанд. Онҳо ояндаи озод аз стереотипҳоро месозанд», — таъкид намуд Сарвиноз, фаъоли гендерии САҲА.
«Марказҳои захиравии занон нақши калидӣ дар дастгирии ҷабрдидагони зӯроварӣ мебозанд, ба онҳо кӯмак ва хидматҳои зарурӣ барои барқароршавӣ ва ҳифз пешниҳод мекунанд», — қайд намуд Гулчеҳра Ҳасанова, директори маркази “Кӯҳсор”.
«Ин форум — имконияти муҳим барои муттаҳид намудани саъю кӯшишҳои ҳамаи ҷонибҳои манфиатдор аст. Амалиёти ҳамҷоя ва мубодилаи таҷриба ба таҳияи роҳҳои муассири мубориза бо зӯроварӣ ва дастгирии занони ҷабрдида кӯмак мекунад», — қайд намуд Гулрухсор Абдуллоева.
Дар ҷараёни форум ду сессия баргузор шуд: сессияи аввал ба ташаббусҳои фаъолони гендерӣ дар самти татбиқи Конвенсия оид ба барҳам додани тамоми шаклҳои табъиз нисбат ба занон бахшида шуд, ва сессияи дуюм ба нақшаи корӣ барои соли оянда, ки ба стратегияи ҷомеаи шаҳрвандӣ вобаста ба тағйири рафтор дар масъалаҳои пешгирии зӯроварӣ асос ёфтааст, равона гардид.
#GenderandDevelopment #OSCE #ЖизньбезНасилия
